Në Qendrën Memoriale në Potoçari, në 31-vjetorin e gjenocidit të Srebrenicës, do të varrosen mbetjet mortore të dhjetë viktimave të identifikuara.
Viktima më e re është Senad Jusiq, i lindur në vitin 1975, i zhdukur në korrik 1995 në zonën e Bratuncit. Mbetjet e tij mortore u gjetën dhe u zhvarrosën në vitin 2022. Viktima më e moshuar është Ramo Dautoviq, i lindur në vitin 1939, i cili u zhduk në zonën e Zvornikut.
Më 11 korrik, në Bosnje dhe Hercegovinë dhe në shumë vende të botës shënohet 31-vjetori i gjenocidit të Srebrenicës, krimi më i rëndë i luftës në Evropë pas Luftës së Dytë Botërore, gjatë të cilit në korrik të vitit 1995 u vranë mbi 8.300 burra dhe djem boshnjakë.
Në ceremoninë përkujtimore në Potoçari pritet të marrin pjesë delegacione vendore e ndërkombëtare, si dhe mijëra pjesëmarrës të Marshit të Paqes, të cilët për tre ditë ecën përgjatë rrugës së përdorur nga të mbijetuarit gjatë përpjekjes për t’u larguar nga Srebrenica e rrethuar.
Deri më tani, në Qendrën Memoriale në Potoçari janë varrosur 6.772 viktima, ndërsa rreth 250 të tjera janë prehur në vende të tjera sipas dëshirës së familjeve. Mbi 1.000 persona nga Srebrenica dhe komunat përreth vazhdojnë të figurojnë të zhdukur.
Gjykata Ndërkombëtare e Drejtësisë në vitin 2007 konstatoi se Ushtria e Republikës Sërpska kreu gjenocid në Srebrenicë në korrik të vitit 1995. Gjykata gjithashtu e shpalli Serbinë përgjegjëse për mosparandalimin e gjenocidit dhe për dështimin në ndëshkimin e autorëve.
Deri më sot, më shumë se 50 persona janë dënuar me mbi 700 vjet burgim për gjenocid dhe krime lufte në Srebrenicë. Me burgim të përjetshëm janë dënuar, ndër të tjerë, ish-presidenti i Republikës Sërpska, Radovan Karaxhiq, dhe ish-komandanti i ushtrisë së këtij entiteti, Ratko Mlladiq.
