Gjykata Penale ka caktuar paraburgim prej 30 ditësh për drejtorin e Ndërmarrjes Publike “Higjiena Komunale”, Sabahudin Rustemi, si dhe për përgjegjësin e mbeturinave në këtë ndërmarrje. Prokuroria sot ka kërkuar paraburgim për të dyshuarit për shkak të dyshimeve se kanë kryer veprën penale “Rrezikim i mjedisit jetësor dhe natyrës nga mbeturinat”, sipas nenit 230, paragrafi 1 i Kodit Penal.
“Sipas vendimit të gjykatës, për të dyshuarit S. R. dhe A. S., të punësuar në NP ‘Higjiena Komunale’, masa e paraburgimit është caktuar për shkak të bazave të parashikuara në nenin 165, paragrafi 1, pika 2 dhe 3, përkatësisht – rreziku për pengimin e hetimeve ose ndikimin ndaj dëshmitarëve, si dhe mundësia e përsëritjes së veprës penale”, thuhet në njoftimin e Gjykatës Penale.
Kundër këtyre vendimeve, palët kanë të drejtë ankese para Këshillit Penal të kësaj gjykate.
Prokuroria sot njoftoi se të dyshuarit kanë vepruar së bashku në kundërshtim me Ligjin për menaxhimin e mbeturinave dhe me veprimtarinë e tyre bazë për mbledhjen dhe transportimin e rregullt të mbeturinave të padëmshme në territorin e Qytetit të Shkupit, si dhe me detyrimet e përcaktuara në Programin Operativ për mbledhjen dhe transportimin e mbeturinave komunale dhe në Planin Operativ për mirëmbajtjen e pastërtisë publike në qytet.
“Duke mos ushtruar mbikëqyrje të plotë mbi mbledhjen dhe transportimin e mbeturinave komunale, si dhe me menaxhim të parregullt të mbeturinave, ata kanë mundësuar që gjatë këtij muaji të krijohen deponi të vogla në sipërfaqe publike dhe rrugore, pranë kontejnerëve të parashikuar për mbledhjen e mbeturinave komunale, me ç’rast kanë shkaktuar dëmtim të konsiderueshëm të cilësisë së tokës, ajrit dhe ujit, dhe kanë rrezikuar jetën dhe shëndetin e njerëzve nga mundësia e përhapjes së sëmundjeve infektive apo të tjera”, thuhet në njoftimin e Prokurorisë.
