Ata dyshohen se kanë kryer vepër penale të rrezikimit të mjedisit jetësor dhe natyrës me mbeturina, pasi kanë vepruar në kundërshtim me Ligjin për menaxhimin e mbeturinave dhe me veprimtarinë bazë të Ndërmarrjes Publike “Higjiena Komunale”, që është mbledhja dhe transportimi i rregullt i mbeturinave komunale në territorin e Qytetit të Shkupit.
Prokuroria Themelore Publike e Shkupit ka hapur hetim dhe ka propozuar paraburgim për ushtruesin e detyrës së drejtorit të Ndërmarrjes Publike “Higjiena Komunale”, Sabahudin Rustemi, si dhe për shefin e sektorit të menaxhimit me mbeturina, Aki Saiti.
Sipas Prokurorisë,
“duke mos ushtruar mbikëqyrje të plotë mbi mbledhjen dhe transportimin e mbeturinave komunale, si dhe duke menaxhuar në mënyrë të parregullt me mbeturinat, ata kanë lejuar që gjatë këtij muaji të krijohen deponi të vogla në hapësira publike dhe rrugore, pranë kontejnerëve të parashikuar për mbledhjen e mbeturinave komunale. Me këtë kanë shkaktuar dëmtim të konsiderueshëm të cilësisë së tokës, ajrit dhe ujit dhe kanë vënë në rrezik jetën dhe shëndetin e njerëzve nga mundësia e shfaqjes së sëmundjeve ngjitëse apo të tjera,”
thuhet në njoftimin e Prokurorisë Publike të Shkupit.
Nga aty shtojnë se dyshimet e tilla janë konstatuar gjatë kontrolleve të jashtëzakonshme inspektuese, të kryera me urdhër të Prokurorisë, si dhe me mendimin ekspert të marrë nga Instituti i Shëndetit Publik.
Më herët sot, Prokuroria informoi se Rustemi dhe Saiti ndodhen ende në stacionin policor të Gazi Babës, brenda afatit 24-orësh të paraparë për ndalimin policor. Ata u arrestuan dje në lidhje me problemin e mbeturinave në kryeqytet.
