Mbyllet për publikun seanca në rastin “Banjska”, do të dëgjohet një dëshmitar anonim
Me propozim të prokurorit special Naim Abazi, është mbyllur për publikun seanca e së hënës në Gjykatën Themelore në Prishtinë në rastin “Banjska”, pasi do të dëgjohet dëshmitari anonim A2.
Në këtë rast, lidhur me sulmin terrorist të 24 shtatorit 2023 në fshatin Banjskë të Zveçanit, po akuzohen: Vladimir Toliq, Dushan Maksimoviq dhe Blagoje Spasojeviq, për të cilët është veçuar procedura nga të akuzuarit tjerë, të cilët deri tani janë të paarritshëm për drejtësinë.
Fillimisht, prokurori special Naim Abazi kërkoi që seanca të mbyllet përkohësisht për publikun, për shkak se do të dëgjohet dëshmitari anonim A2, raporton “Betimi për Drejtësi“.
Prokurori Abazi kërkoi që seanca të mbyllet derisa të dëshmojë dëshmitari që gëzon statusin e dëshmitarit anonim.
“Kërkojmë nga Gjykata të aprovojë kërkesën e Prokurorisë dhe të urdhërojë që kjo seancë të zhvillohet me dyer të mbyllura, në mënyrë që të respektohen dispozitat ligjore për mbrojtjen e dëshmitarëve”, tha Abazi.
Mbrojtësi i Blagoje Spasojeviqit, avokati Ljubomir Pantoviq tha se pajtohet me propozimin e prokurorit nëse dëgjon arsyet konkrete se pse do të ndikonte negativisht në dëshmitarin dhe në proces, dëgjimi i hapur i dëshmitarit anonim A2.
“Ne nuk kemi dëgjuar arsye nga prokurori dhe kërkoj të mos e aprovoni këtë propozim”, tha Pantoviq.
Më pas, kryetari i trupit gjykues Arben Hoti mori aktvendim me të cilin aprovoi propozimin e prokurorit që seanca të mbyllet për publikun gjatë dëgjimit të dëshmitarit A2, me qëllim të mbrojtjes së dëshmitarëve.
