Sot, filloi gjyqi më i rëndësishëm në vend. Familjet e 63 viktimave të zjarrit në diskotekën e Koçanit “Puls” kërkojnë drejtësi për jetën e ndërprerë të të dashurve të tyre dhe për dhimbjen e shkaktuar të lënduarve dhe të gjithë atyre që u prekën nga ngjarja tragjike. Është njoftuar se do të mbahen dy seanca dëgjimore në javë, në mënyrë që gjyqi të marrë një zgjidhje në kohë dhe me cilësi të lartë. Në bankën e të akuzuarve do të ulen 38 të pandehur, përkatësisht 35 individë dhe tre kompani, ndërsa përballë tyre do të jenë 15 prokurorë, transmeton Portalb.mk.
Gjykimi po mbahet në sallën digjitale të gjyqit brenda institucionit ndëshkues-korrektues “Idrizovë”, i cili pretendohet se ka kapacitet hapësinor dhe aftësi teknike për një gjykim kaq kompleks. Gjyqtare në këtë gjyq do të jetë Dijana Gruevska Ilievska.
Lëvizja “Kush e ka radhën” kërkuan gjyq të paanshëm, profesional dhe plotësisht transparent, “të lirë nga kthetrat politike”.
“Drejtësia për të gjitha viktimat e zjarrit në Koçan nuk është dëshirë, por detyrë! Ne do të ndërmarrim veprime, duke siguruar që përgjegjësia të mbizotërojë dhe që zërat e të prekurve të dëgjohen. Është detyra jonë ta transformojmë hidhërimin në qëllim dhe të bashkohemi për ndryshime kuptimplote”, thonë Lëvizja “Kush e ka radhën”.
Kujtojmë se gjyqtarja që po gjykojn në gjyqin e zjarrit në diskotekë Pulse, Gruevska-Ilievska, ka 19 vjet përvojë gjyqësore dhe portofoli i saj i punës përfshin gjyqe të profilit të lartë në rastet kundër ish-kryeministrave Vllado Buçkovski dhe Zoran Zaev, dhe ishte gjithashtu në këshillin gjyqësor të gjyqit për “Titanik” kur një pjesë e udhëheqjes së VMRO-DPMNE ishte në bankën e të akuzuarve. Ajo kryesoi gjithashtu këshillin që gjykoi aksidentin e rëndë të autobusit në Laskarcë në vitin 2019, kur 16 persona vdiqën dhe 37 u plagosën.
Pavarësisht faktit se Prokuroria ka ngritur akuza kundër 34 personave dhe tre kompanive, dhe priten akuza kundër 26 zyrtarëve të policisë muajin e ardhshëm, që do të thotë se numri i të pandehurve do të jetë mbi 60, familjet ende mbeten dyshuese se e vërteta është fshehur këtë herë.
Ata kërkojnë të përcaktohet se ku ndodhën dështimet, kush nuk reagoi, cilat institucione vonuan, ndërsa gruaja e njërit prej këngëtarëve të “DNK” që vdiq në zjarr, tha se hetimet mbetën të paplota me shumë pyetje të hapura, rrethana pa përgjigje dhe të paqarta.
Prindërit dhe të afërmit e të ndjerëve presin të dëgjojnë disa nga përgjigjet në gjyqin e së mërkurës, kur të gjithë sytë do të jenë në sallën e re dhe të madhe të gjyqit në Idrizovë dhe pronari i diskotekës, inspektorët, ish-kryetarët e komunës së Koçanit, ish-ministrat do të ulen në bankën e të akuzuarve.
Zjarri në Koçan shpërtheu natën e 15-16 marsit, duke rezultuar me 63 viktima dhe duke plagosur pothuajse 200 të tjerë. Prokuroria ka ngritur akuza kundër 34 personave të cilët, nëpërmjet veprimeve ose mosveprimeve të tyre brenda sistemit, shkaktuan katastrofën. Aktakuza përfshin gjithashtu tre kompanitë e pronarit të diskotekës, i cili është i pandehuri kryesor.
