Ashtu siç ishte paralajmëruar, zëvendëskryeministër i parë i Maqedonisë së Veriut do të jetë deputeti aktual i Alternativës Bekim Sali, në vend të Izet Mexhitit i cili tashmë ka marrë detyrën e kryetarit të komunës së Çairit.
Zëdhënësi i koalicionit VLEN Driton Sulejmani tha se Sali në atë pozitë do të jetë si përfaqësues i koalicionit dhe jo i partisë së tij. Ndërsa për ndryshimet e tjera kadrovike tha se do të vendosin në mënyrë shtesë.
“Ne vetëm se jemi duke funksionuar si VLEN. Të gjitha ministrat momental që janë e kanë përfaqësuar VLEN-in, jo subjektet e tyre politike dhe e tillë do të jetë situata edhe pas këtyre zgjedhjeve. Zotri Bekim Sali do të jetë zëvendës kryeministër i parë, që do ta përfaqësoj VLEN-in. Kurse sa i përket çështjeve tjera kadrovike, ende nuk ka ndonjë vendim konkret dhe do të shohim në ditët në vijim se çka do të ndodh”, deklaroi Sulejmani.
