Kryetari i Aleancës për Shqiptarët, Ziadin Sela, ka reaguar ashpër ndaj deklaratës së Izet Mexhitit, i cili më herët kishte thënë se “skena politike është aq e përzier sa nuk përjashton mundësin që Ziadin Sela të bëhet pjesë e qeverisë”.
Në një status në rrjetet sociale, Sela i është përgjigjur drejtpërdrejt Mexhitit, duke e akuzuar për gënjeshtra dhe propagandë, ndërsa theksoi se e vërteta është e qartë dhe e vetme.
“E ngatërruar është gënjeshtra, Izet, propaganda dhe e pavërteta. E vërteta është çdoherë e pastër e pa përzier, është vetëm një e s’mund të jetë dy e as më shumë. Dhe kjo e vërtetë tingëllon kështu, Izet!
👉 Ti në komunikim me mua – JO.
❌ Unë pjesë e qeverisë – JO.
👉 Unë në krah të atyre që duan të na zhbëjnë të drejtat si popull – JO.”
Sela shtoi se kontributin e tij në politikë e mat me punën për barazinë e shqiptarëve, jo me privilegjet e pushtetit.
“Do kemi punë bashkë në parlament me ju e me VMRO-në. Si çdo herë – pushteti nga njëra anë, e unë nga ana tjetër. Jo në krah, por ballë për ballë!” – përfundon Sela.
