Drejtori i Ndërmarrjes “Higjiena Komunale – Shkup” është liruar disa orë pasi u ndalua në stacionin policor — ai nuk është fajtor për asgjë, e ka kryer punën e tij me ndershmëri dhe përkushtim, shkroi në rrjetet sociale kryetarja e qytetit të Shkupit, Danella Arsovska.
Kjo informatë erdhi pasi, pas disa orësh bindje në stacionin policor, drejtori i “Higjienës Komunale” u kishte thënë se “në zemër dhe në shpirt është VLEN”, dhe që aty menjëherë i kishin sjellë një deklaratë për anëtarësim në parti, të cilën e kishte nënshkruar, pas së cilës u lirua për të vazhduar me punën e tij të suksesshme në ndërmarrje.
“Në ndërkohë, Mickoski dhe VMRO-ja me ngulm kërkojnë që të arrestohet dikush nga BDI-ja, siç kishin premtuar. Fillimisht u nisën pas Izet Mexhitit nga BDI, por pasi ai u bë pjesë e VLEN-it, e morën në koalicion”, shkroi Arsovska në rrjetet sociale.
Sa i përket arrestimeve në “Higjienën Komunale”, ajo edhe më herët kishte reaguar në “Facebook”. Arsovska shkroi se kryetarja e Bordit Drejtues, Julijana Spirovska, “nuk do të arrestohet sepse ka një album me fotografi me të gjithë funksionarët e VMRO-së”.
“Julijana, e cila drejton ‘Higjienën Komunale Shkup’, është e dënuar për vrasje në vitin 2022 me dënim me burg, dhe e dënuar në vitin 2006 për shkaktim të lëndimeve të rënda trupore. Julijana në KHS komandon anëtarët e tjerë të Bordit Drejtues nga VMRO dhe VLEN, të cilët janë emëruar nga Këshilli i Qytetit të Shkupit — nga VMRO dhe VLEN. Julijana për tre vite ka bllokuar blerjen e kamionëve të rinj, programin investues dhe punësimin e punëtorëve që prej pesë vitesh pastrojnë rrugët, të cilët nuk mund të marrin vendime punësimi për shkak të bashkëpartiakëve të saj nga VMRO dhe VLEN në Këshill. Julijana, me urdhër të VMRO-së, vazhdimisht prej vitesh bën obstruksione derisa qyteti po mbytet në mbeturina. Dhe tani, sipas tyre, fajtor qenka drejtori që nuk ka arritur të blejë 35 kamionë të rinj, sepse Julijana e ka shtyrë procesin që t’i blejë Orce,” shkroi Arsovska.
